【曾智華專欄】包租公驚恐症

「天王」張學友接受訪問，大談理財。佢上世紀八十年代出道，當年的唱片賣到爆瀉，版稅豬籠入水。不過，可能紅得太快，壓力狂大，不知點舒解，故有段時間，晚晚跟當年經理人陳自強「隊」白蘭地，飲到High時就玩掟蛋糕宣泄。
　　
呢種荒唐日子，不少巨星都曾經歷過，並非「不正常」！幸而人總會慢慢成熟，有了女朋友，結婚後，多會定性。兼且冇人的士途會似一條大直路，總有這樣那樣的挫折，跌跌撞撞中，終會了解人生，學會Behave。
　　
學友由上世紀八十年代開始，其實搵過好多好多錢。只是藝人十之八九除了演藝之外，一竅不通，包括投資。當佢哋擁有億億聲金錢時，第一，當然「身痕」，想有這樣那樣的投資；第二，大把「投資顧問」埋身𠱁你做這樣那樣的「投資」（其實賺你佣兼攞你的錢去較飛）。結果幾乎冇一位巨星未試過——蝕到啞咗，血流成河！
　　
學友當然不例外。幸而佢早年單單在內地巡迴又巡迴的演唱會，簡直似印銀紙，只要不再聽埋啲蠱惑「投資顧問」點，安安穩穩，保保守守，肯定自己及下代絕對不愁生活，財務絕對自由。
　　
學友接受訪問，講及做包租公經驗，呻到樹葉都落。這個，小弟百分百有共鳴！
　　
放樓出租，收得三兩厘利息，但卻似在做租客「奴隸」，辰時卯時二十四小時都會Call你投訴，一時話雪櫃冷氣機壞，一時又話樓上及窗台漏水，一時又話熱水爐冇熱水、水力唔夠猛……大佬呀，租間樓畀你，要全天候服侍你？為乜呀？學友肯定㷫到爆炸，想捉個租客問：「老友，你可知我每分鐘值幾錢？」
　　
此外，若遇着個租霸，更大鑊！一係拖租，一係索性唔交。你追得兩追，佢可能變破壞王，搞到間屋變垃圾堆填區，將全部牆畫花，用紅毛泥塞廁所渠，掉低鎖匙就失蹤，令你欲哭無淚。
　　
張學友以天王身分，若要親身處理上述問題，你話幾戇居？若交託物業管理公司做，咁收嗰一兩厘利息租金全化煙，變儍佬！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。