【曾智華專欄】長者齊忍尿兩小時

睇長者早場，已屬小弟每周指定動作。總之凡港產片，就盡量周四睇第一場，間中九點，也有十點，睇完行吓街市或超市就回家。
　　
長者早場特色，絕大部分六十五歲至八十歲（可能六十五歲以下仍未能真正退休）觀眾，故有著共同「問題」。例如眼蒙耳聾（開映後上樓梯要特別小心，間中有人仆倒。電話響不懂即關，只大嗌：「睇緊戲啊！收線啦！」搞到全場嬲佢唔知，話佢唔好意思）。又例如冇耐性（甚至我也如是），開映十分鐘就見人咿咿哦哦：「都唔知乜戲嚟，去飲茶好過！」），最多當然是年紀大膀胱壞，需要不時出出入入去廁所（當然，也可能劇情冇吸引力）。
　　
所以，若果上述三樣都冇出現，意即套戲好掂：一、人人早早入場，乖乖坐定定，有所期待；二、電影精采，當然不會中途離場；三、若劇情似有磁石，咁就死忍都唔去廁所喇！
　　
呢呢，上周四我就撞正一套這樣的電影《窄路微塵》，真的有點意外。
　　
因為此片絕對是小本製作，冇大卡士，導演是個新人。事實，男女主角張繼聰及袁澧林，更是第一次擔正做大電影主角。不過，唔聲唔聲，嚇你一驚，兩人齊齊入選第五十九屆金馬獎最佳男女主角提名，這已是一個相當高的肯定，作為演員，應有極大滿足感。
　　
究竟點解《窄路微塵》可吸住長者觀眾靜靜欣賞而中途不行出行入？我唔知，我只知自己也如是，結果到劇終字幕出現才願意起身。
　　
此片低調又簡單，描述一個單人清潔公司經營者，在過去幾年，疫情肆虐，面對百業蕭條，苦苦掙扎。偶然遇上一個蠱蠱惑惑的美女單親媽咪，火花慢慢不覺地燃燒起來，一切沒有突然，只令人會心微笑。
　　
張繼聰原來由童星做起，已演了三十五年。很喜歡佢套自然演繹法，少少麻甩，經常欲語無言，很是吸引。事實，在另一套大收的《飯戲攻心》中，論演技，佢絕對在黃子華之上。希望由呢度開始，阿聰可以正式坐正，不用做綠葉！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。