【曾智華專欄】「自然力量」與「轉跑道」

周二小弟貼士又再「中規中矩」，只畀一隻「自然力量」，W出有近四倍，似乎有少少超賠率。正如當日本欄指出，呢場部署非常易拆局，就是姚本輝出一隻高分重磅馬「總理」，目的是要令另一匹旗下馬「自然力量」可以孭最輕磅上陣。結果一如所料，清風送爽，在毫無難度下彈離勝出，擺明Sure Win。希望日後再有這類明刀明槍「派錢馬」就正嘞！
　　
近期有個現象，令人不快，為弱勢騎師全面被冷落，佢哋再磨下去，根本是浪費青春！
　　
周三九場馬，有三位騎師並非停賽，但竟然一匹馬也無得騎，包括：黎海榮、巫顯東及黃皓楠。點解會搞成咁？馬會高層又點睇呢個現象？會否任由其繼續呢？
　　
事實，今季以上三位騎師，加埋黃俊，四個表現相當不堪，尤其「大師傅」黎海榮及巫顯東，騎咗接近半季，竟然連一隻頭馬也冇，究竟搞乜鬼？
　　
騎師可能呻：「都冇好馬騎，點可以有W喎。」
　　
咁問題嚟嘞，個個馬主及練馬師都想贏馬，若你騎功得，為乜唔畀你騎，而要配潘頓、何澤堯、布文或田泰安？尤其潘頓，少少機會都熱過火屎，若任何冷門騎師有少少機會，計計值博率，當然列入考慮，點會Say No呢？
　　
Say No，正正因馬匹畀你騎，絕大機會誤於庸手！喂，若之前領過嘢，一次兩次三次後，咁就儍嘅先會畀馬你博啦吓嘛？你估馬場係善堂乎？
　　
其實策騎乃一個表演行業，有料、冇料及有冇天分，一落跑道就知。唔使資深嘞，普羅馬迷也會個個有眼見，根本上，本土的黎海榮、巫顯東、黃俊及黃皓楠表現完全唔及格，外籍的波健士、麥利奧及馬雅，也不應發牌，因太水皮了。有佢哋在，拉低晒競賽水平！
　　
小弟忠告，唔夠班的本土騎師，快快「轉跑道」，改做助理練馬師或騎馬人吧。再磨落去，也是浪費時光，最終被人請走，冇晒癮㗎！
　　
明天沙田賽事，我提供一隻長途馬，布文騎賀賢的「健康馬」，二千米為其強項，起筷！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。