【曾智華專欄】輝哥推介有火Jack

跟住嘴尖到飛起的輝哥（吳錫輝）四圍食，食足幾十年，真過癮。佢乃天生食家，我則天生為食，雙劍合璧，食盡港九新界大灣區。
　　
尤其近十年，大家從全職退下，更多時間呢度食、嗰度食。若發現有心有火有力的新食肆，必定推介，再呼朋引類頻頻幫襯，以作鼓勵。由此，結下不少美食緣，真係食之不盡。
　　
上月輝哥又拉我講：「肥碌，最新發現，在一個三山五嶽地區（太子基隆街及白楊街交界），近日出咗位高佬Jack，做潮州菜，非常有Heart，雖非味味正，但勝在肯鑽研鬥心強，其中有幾款拿手出品，一於約埋『為食敢死隊』殺去！」
　　
未去前，起起阿Jack係乜底先。哦⋯⋯原來出自飲食世家，父親在該區打躉超過六十年，經營「和昌大排檔」賣潮州滷水鵝，及後也經營快餐館，由此養大一家六口。阿Jack為孻仔，上有三位家姐，幼承庭訓，對飲食業營運管理有心得，早年已出任名牌「大公館集團」總經理，闖出自己的一番事業。
　　
不過，父親「高佬叔」年紀漸大，捱足大半世，決定退休去也。
　　
咁打下的江山邊個接？理所當然就由阿Jack接棒！
　　
呢位身高六呎的高佬Jack充滿雄心壯志，一孭起家族招牌，當然唔會單做快餐店咁普通，故此，立即大展拳腳，將「和昌」定位為一家出品高質素正宗潮菜的食肆，兼且引入不少新意念。
　　
例如一年前已經炮製出招牌菜，變成鎮店出品的滷水慢煮牛面珠，的確正，入口即融。點解咁勁？皆因以澳洲穀飼牛作原料，用攝氏七十五度在滷水汁中慢煮十八小時。其實潮州並冇慢煮呢種做法，這正正印證高佬Jack的創作力。
　　
輝哥引領的一餐，坦白，並非味味正，但七成水準以上，已經非常難得。
　　
歎潮州菜，單尾我必定要求來一碟沙茶牛肉炒粿條，因入口便可鑑定廚師做傳統潮州菜的功力，「和昌」的，有料到！一餐既罷，即卜下次「試真啲」！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。