【曾智華專欄】「幕後人」也輸甩褲

上周六本報馬經版專欄《馬場浮世繪》爆料，指有馬房多人欠貸，被馬會研訊徹查。呢單消息當然震動馬圈，因肯定大把手尾跟。
　　
報道指馬會日前公布，兩地馬房營運部主管鄭奇龍轉介一宗事件，涉及馬房員工的操守行為，據知所指馬房為苗廄，董事小組立即進行問話，聽取證供後，另訂日期研訊。
　　
此事聽講非常複雜，可能牽涉範圍甚廣，導火綫是有騎馬人債台高築，搞到「收數佬」踩上馬會寫字樓追債，非常尷尬。
　　
眾所周知，馬會高層極度重視機構形象。多年來屢屢與廉政公署合作，攜手將不少犯案者繩之於法。判入獄的由上至遴選委員、練馬師、騎師，下至馬房員工皆有。所以，若今次查證事件牽涉任何罪案，也一定不會手軟！
　　
事件曝光後，資深馬迷皆感歎：「唔怪得今季苗禮德馬房好似食錯藥咁啦，好哋哋一個中游馬房，今季跑咗幾個月，只贏得兩場馬，變包尾大幡，表現完全失常，原來⋯⋯咁，似乎在未搞清事實前，呢個馬房的參賽馬，都係避開好啲嘞，因唔知涉事員工有幾多，介入有幾深，牽連有幾廣，全部影響真正競賽也！」
　　
小弟投注賽馬幾十年，當然不會天真到認為所有賽事皆「真跑」，而所有騎練皆「正人君子」啦。不過，馬場就是一個社會縮影，乜人都有，有正有邪，所以，監管非常重要，不得有誤。
　　
普羅馬迷睇跑馬，以為幕後人（馬主、騎練、馬會員工⋯⋯）必定贏大錢，真相又如何？
　　
某位資深馬會極高層笑笑口：「碌Sir，若咁易贏錢，佢哋就唔使天寒地凍日日三點幾起身開工啦。其實愈以為自己知得多者，會愈賭得大。一場馬幾百個因素影響賽果，真正贏嘅所謂『幕後人』好少，輸甩褲我就見得多！」
　　
這趟個案可能正是有人輸甩褲，走投無路也。
　　
今晚研究大長途二二○○米，姚本輝出兩隻，高分「總理」孭重磅，令「自然力量」可孭最輕磅，後者做膽可也！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。