【曾智華專欄】跌鬼死你呀

世事好多難料，但亦有不少，唔使水晶球都知一定會咁發生，貼馬有咁準就好嘞。
　　
例如，我早早講過，世界盃期間，警方必定高調大力掃盪外圍。因呢段期間，平時唔賭的都會走去賭，令外圍佬發大達，搶走十億元計稅款及善款。若警方唔高調做嘢（你可以話做騷），咪畀外圍佬威晒？所以，一定要話畀全世界知，香港如今邊個話事先？囂張嗰個，先拉嗰個！
　　
果然過去三個星期不停拉拉拉。不過收外圍咁好搵，兼且如今科技先進，提供畀班友N種「保護傘」，自然拉之不盡。
　　
事實上，自從疫情之後，大量賭仔不能「過大海」，咁點搞？賭癮發作時，就會走去非法賭檔。香港有幾多賭仔？你睇睇正常時期澳門幾風生水起就知嘞。當然，賭客不少來自內地，但香港班上晒癮的賭精，也日日二十四小時輪流過去貢獻，你查查每日港澳航班搭客人數就知，賭仔係幾「前仆後繼」過澳門貢獻。
　　
好嘞，冇得過澳門，怎不令香港非法賭檔似雨後春筍？佢哋乜都有得賭。幕後大老闆只需搵個單位（通常在工業大廈）做竇，然後搵個道友、阿叔或阿嬸出面做「主持」（畀足安家費及律師費），咁就可以招客大賭特賭，自己「安全地」豬籠入水。
　　
上周元朗警區特別職務隊根據「綫報」，掩至安寧路一單位突擊搜查，單位內三名懷疑賭徒為逃走，竟搵命博跳落天井，以為走得甩。結果傷腳又傷頭被捕！點解？你係警察，行動前都會睇晒單位建築圖，知有幾多個位可走，然後兵分幾路拉人啦，正蠢蛋！其實非法賭博乃普通罪行，除非身有屎，使乜搵命博。
　　
此事令我想起上世紀八十年代拍電視紀錄片，跟掃黃隊出動。之前又係完全掌握目標單位有幾多道「逃生門」。某次突擊架步，房門打開，雞飛狗走，N個未成年少女準備跳窗。樓下女警大嗌：「阿女，咪呀，跌死你㗎，唔好搵命博呀！」女警經常做埋社工及心理輔導員㗎。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。