【曾智华专栏】跌鬼死你呀

世事好多难料，但亦有不少，唔使水晶球都知一定会咁发生，贴马有咁准就好嘞。
　　
例如，我早早讲过，世界杯期间，警方必定高调大力扫荡外围。因呢段期间，平时唔赌的都会走去赌，令外围佬发大达，抢走十亿元计税款及善款。若警方唔高调做嘢（你可以话做骚），咪畀外围佬威晒？所以，一定要话畀全世界知，香港如今边个话事先？嚣张𠮶个，先拉𠮶个！
　　
果然过去三个星期不停拉拉拉。不过收外围咁好揾，兼且如今科技先进，提供畀班友N种“保护伞”，自然拉之不尽。
　　
事实上，自从疫情之后，大量赌仔不能“过大海”，咁点搞？赌瘾发作时，就会走去非法赌档。香港有几多赌仔？你睇睇正常时期澳门几风生水起就知嘞。当然，赌客不少来自内地，但香港班上晒瘾的赌精，也日日二十四小时轮流过去贡献，你查查每日港澳航班搭客人数就知，赌仔系几“前仆后继”过澳门贡献。
　　
好嘞，冇得过澳门，怎不令香港非法赌档似雨后春笋？佢哋乜都有得赌。幕后大老板只需揾个单位（通常在工业大厦）做窦，然后揾个道友、阿叔或阿婶出面做“主持”（畀足安家费及律师费），咁就可以招客大赌特赌，自己“安全地”猪笼入水。
　　
上周元朗警区特别职务队根据“线报”，掩至安宁路一单位突击搜查，单位内三名怀疑赌徒为逃走，竟揾命博跳落天井，以为走得甩。结果伤脚又伤头被捕！点解？你系警察，行动前都会睇晒单位建筑图，知有几多个位可走，然后兵分几路拉人啦，正蠢蛋！其实非法赌博乃普通罪行，除非身有屎，使乜揾命博。
　　
此事令我想起上世纪八十年代拍电视纪录片，跟扫黄队出动。之前又系完全掌握目标单位有几多道“逃生门”。某次突击架步，房门打开，鸡飞狗走，N个未成年少女准备跳窗。楼下女警大嗌：“阿女，咪呀，跌死你㗎，唔好揾命博呀！”女警经常做埋社工及心理辅导员㗎。

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。