【曾智華專欄】馬會吐氣揚眉

任何有自尊、有鬥心的個人、機構、城市，以至國家，最耿耿於懷的，一定是畀人睇死。
　　
一切以成敗戰績論英雄。所以，當你交不出實際成績，被睇死，大啖烏氣只可往肚裏吞，難道跳出來呼怨？冇咁唔成熟吓嘛？
　　
可以做的，是繼續刻苦修煉，最終以事實告訴睇死你的人：「老友，你好鬼有眼無珠噃！」
　　
馬會過去的日子，有兩件事肯定相當谷氣，但又無法公開辯駁。一為引入的拍賣馬冇乜特別標青貨色，故被「多口界」揶揄——不如執咗佢！二為被嘲笑所搞的《香港國際賽事》，根本是外隊的提款機，尤其日本隊，次次捧巨額金錢走。
　　
好嘞，谷咗幾年，上周日相信所有現任及前任馬會董事及高層，必會開心到大灌香檳，因為終於吐氣揚眉，上述的兩項「睇死」，一日內全部平反！以事實話畀班「多口友」知，你哋錯得交關！
　　
首先，今年毫無爭議的馬王，非「浪漫勇士」莫屬。這隻身價四百八十萬元的馬會拍賣馬，去年十月二十日首戰已一鳴驚人，雖排大外檔，仍彈離勝出。此馬至今贏咗九場，最新令全港馬迷興奮到爆的，正是在香港盃跑二千米，令六匹外隊馬（當日五隻為日本代表！）食塵，以大超班姿態收韁勝出，犀利無比。「浪漫勇士」出道至今，贏得總獎金共六千二百一十九萬五千四百元，是四百八十萬元拍賣價的十幾倍！以後誰敢指馬會拍賣馬冇料到？
　　
另外，今屆四場國際賽，三場由香港隊勝出，當中兩隻冠軍由本土練馬師訓練。而千二米一場香港短途錦標，更由香港代表包辦前四名，外隊得個桔！今次自己人「撳」去大部分獎金，顯示過江龍不一定能「抬錢走」！
　　
特首猛喊「Hong Kong Is Back」！這個尚待進一步事實確認。但大家見到的《香港國際賽事》萬人空巷及香港隊成績，小弟拍心口講句——Hong Kong Horses And Fans Are Back！氣勢勁度比天高！
　　
大賽過後，唔好畀佢停，今晚再跑九場。
　　
提供第七場冷冷哋的「精英至尊」及「胡椒軍曹」。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。