【曾智華專欄】管理超嚴，轉身超快

早年認識一位中國政治評論家W伯，向我講：「阿碌，中國領導人出牌，冇乜手影捉㗎。所以，外國人根本唔識睇，西方班所謂中國觀察家，多數冇料到，大隻講。至於香港班親中人士也一樣，經常跟車太貼，結果撼崩鼻要自圓其說，瘀爆！」
　　
十年前，W伯已仙遊。但佢的教誨，我永遠記住。故此，凡分析中央決策，絕對唔會一口咬死，以免變「儍佬」，畀人笑到面黃。
　　
呢呢，今次中國防疫政策突然一百八十度大轉軚，又再一次示範——你估我唔到的中國行事模式。
　　
兩周前仍封呢度及嗰度，「大白」處處拉人入隔離營，看似清零政策鐵板一塊在堅持之際，更出現多年未見的社會躁動。
　　
正常估計，對付一切動亂，中央必定貫徹「消滅於萌芽狀態」高壓手法，將帶頭者全部以尋釁滋事罪起訴，邊個出頭拉邊個。
　　
結果？西方觀察家全部跌眼鏡。阿爺不但冇大搜捕，反之，閃電轉身（華麗嗎？），全面高速開放，立即「與病毒共存」，不再提「清零」。
　　
呢下，香港班「強烈支持中央防疫清零」者，立即撼頭埋車窗，要先急煞，再轉軚支持最新的「放鬆防疫、力拼經濟」路綫。
　　
整個由左轉右過程，兩個星期內搞掂，只有「中國速度」才可如此。換轉西方世界，必定有這樣那樣的反對、挑戰，成身汗都未得落實。
　　
中國呢？話做就做。更可以火速全方位動員，民間商界短時間已組成「萬人搶經濟」大軍，打正旗號包機出國搵定單、拓市場、搶先機……
　　
幾個商貿特勁城市，包括浙江、江蘇、四川、廣東、上海、深圳，個個全攻型鬥快「搶錢」。究竟今次會否中「一放就亂，一亂就收，一收就死，一死又放」的定律呢，拭目以待。
　　
西方很多人對「中國制度」不以為然。但看到過去三十年中國的高速起飛，又感到牙癢癢，問：「點解如此集權管治會做得到的？」
　　
以前，有人形容香港是一本深奧的書，難讀得懂。若如此，要讀懂中國，更要具備超人透視力才掂嘞。

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。