【曾智華專欄】導演生涯原是夢

做電影導演，好似好威咁款，尤其去到拍戲現場，總指揮上身，人人要聽佢點，包括身價幾百萬元至上千萬元的巨星。總之，導演未話收貨，你就要NG完再NG。
　　
好嘞，咁，從工作崗位退下來的導演又如何？近期與幾個導演傾開，個個都呻「窮到褲穿窿」。
　　
首先，導演並非穩定工作，就算曾經拍過叫好叫座影片，但也絕無入息保證，也唔知幾時有工開，收入不穩定也冇保障，咁點養妻活兒供樓呢？尤其過去三年，全個影圈一齊拍烏蠅食穀種，日子點過？真係講出都一殼眼淚㗎。
　　
好嘞，就算有個好劇本，但邊個肯投資呢？如今最小本製作都幾百萬元，郁郁上千萬元，而電影投資者根本不多，點搞？
　　
試想想，揸住個劇本四圍拍門求人投資，肯定食檸檬食到失魂，又或會畀人奚落兩句，若自尊心太強，有丁點傲氣的，點頂？
　　
所以，間中你會聽到有導演求親人借錢，甚至賣咗住緊間樓去拍片。咁……即係搵命博！
　　
最近認識一個導演，問佢點維持生活。佢笑笑口：「碌Sir，做我哋呢行，分分鐘要食軟飯㗎！所以，最好老婆有份穩定工作，否則，日日憂柴憂米，牛衣對泣過日子，人唔似人，鬼唔似鬼㗎！」
　　
原來做導演咁辛苦，真係少啲興趣都難捱。
　　
「咁究竟有冇人做導演做到發達呢吓？」
　　
「導演發達？有，不過，大多並非來自導演工作，而是物業投資，例如劉偉強！」
　　
各位，你可知一套戲，要收幾多才唔使蝕呢？就以一套千萬元製作計，首先票房要有二千五百萬元先掂。因院商拆去六成，片商只有四成。好運的，可以賣畀影視串流平台及航空公司，收返幾十萬元。
　　
若香港收得，東南亞及內地賣埠再加歐美，執埋執埋，又會有一百幾十萬元。不過，十套冇一套賺大錢，蝕到眼凸的則超過一半。
　　
拍電影乃半偏門，根本無法估計收入，故此，呢種投資/生意，冇銀行肯借貸，太冒險了。
　　
總之，導演生涯，講來講去，可用兩個字概括——坎坷！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。