【曾智华专栏】导演生涯原是梦

做电影导演，好似好威咁款，尤其去到拍戏现场，总指挥上身，人人要听佢点，包括身价几百万元至上千万元的巨星。总之，导演未话收货，你就要NG完再NG。
　　
好嘞，咁，从工作岗位退下来的导演又如何？近期与几个导演倾开，个个都呻“穷到裤穿窿”。
　　
首先，导演并非稳定工作，就算曾经拍过叫好叫座影片，但也绝无入息保证，也唔知几时有工开，收入不稳定也冇保障，咁点养妻活儿供楼呢？尤其过去三年，全个影圈一齐拍乌蝇食谷种，日子点过？真系讲出都一壳眼泪㗎。
　　
好嘞，就算有个好剧本，但边个肯投资呢？如今最小本制作都几百万元，郁郁上千万元，而电影投资者根本不多，点搞？
　　
试想想，揸住个剧本四围拍门求人投资，肯定食柠檬食到失魂，又或会畀人奚落两句，若自尊心太强，有丁点傲气的，点顶？
　　
所以，间中你会听到有导演求亲人借钱，甚至卖咗住紧间楼去拍片。咁……即系揾命博！
　　
最近认识一个导演，问佢点维持生活。佢笑笑口：“碌Sir，做我哋呢行，分分钟要食软饭㗎！所以，最好老婆有份稳定工作，否则，日日忧柴忧米，牛衣对泣过日子，人唔似人，鬼唔似鬼㗎！”
　　
原来做导演咁辛苦，真系少啲兴趣都难挨。
　　
“咁究竟有冇人做导演做到发达呢吓？”
　　
“导演发达？有，不过，大多并非来自导演工作，而是物业投资，例如刘伟强！”
　　
各位，你可知一套戏，要收几多才唔使蚀呢？就以一套千万元制作计，首先票房要有二千五百万元先掂。因院商拆去六成，片商只有四成。好运的，可以卖畀影视串流平台及航空公司，收返几十万元。
　　
若香港收得，东南亚及内地卖埠再加欧美，执埋执埋，又会有一百几十万元。不过，十套冇一套赚大钱，蚀到眼凸的则超过一半。
　　
拍电影乃半偏门，根本无法估计收入，故此，呢种投资/生意，冇银行肯借贷，太冒险了。
　　
总之，导演生涯，讲来讲去，可用两个字概括——坎坷！

---------------------------------------------

>>>立即浏览【移民百答】栏目：新移民抵埗攻略，老华侨也未必知道的事，移民、工作、居住、食玩买、交通、报税、银行、福利、生育、教育。

>>>即读【新移民专栏】：新移民第一身经验，与你分享当下年轻移民生活日常大小事，即读“新移民专栏”。