【曾智華專欄】拍到大髀都瘀晒

騎騎騎，係咪犀利呢？講邊個？正是講周三兩位當今國際頂級美麗女騎師杜苑欣及賈傑美！不枉我「完全盲目」地瞓身捧場呀！
　　
當晚一如本欄公開，凡佢兩個出場，我就投注WP、Q、PQ、二重彩，再用佢兩位做膽買單T，拖潘頓、莫雅、馬昆、麥道朗及蘇兆輝。結果有三場興奮到震，包括第五場，賈傑美騎二十八倍大冷「逍遙駒」，後段捱到位置，派七十二元！先過咗一場癮（之前佢贏「誠心所願」，兩倍大熱，冇乜興奮）。
　　
然後到第八場，真係攞大命，小弟幾乎拍到大髀都瘀晒！因為一入直路，賈傑美匹冷門，十四倍的「紅運帝王」，以及杜苑欣的超級大冷，近八十倍的「友心友型」雙雙如飛殺上，與實力超班的「順勢而飛」一齊過終點。對，「順勢而飛」兩倍幾大熱，冇乜肉食。但拖著兩位美麗女騎師的冷馬，咁就⋯⋯
　　
等派彩時，個心卜卜跳，好想知單T有幾多錢分。
　　
結果⋯⋯開呀，單T派二千八百二十四元！兩美條位置Q派九百六十九元，真係呢⋯⋯一場已返晒嚟（全晚本錢），兼且大豐收！
　　
到尾場，再有得嗌！因為杜苑欣騎「駿馬快車」，表演超級騎功，一條直路如天馬行空，將本來Sure Win的冠軍殺手潘頓隻大熱「喜駿駒」殺低。過終點後，睇潘頓個款，都似不敢相信——乜有匹馬可以似陣風咁就過頭，太厲害了！
　　
周三心理及荷包大大滿足透，這正是投入賽馬的大樂趣，好難有其他興奮活動可以取代。
　　
明天一年一度高潮又降臨，《香港國際賽事》開波！初步講講小弟分析及決定：
　　
一、決定一蚊都唔買「拉叔」莫雷拉，因佢實在太離譜嘞，話來就來，話走就走。一時話病，一時冇事，一時揸香港騎師資格，一時揸巴西騎師資格，古靈精怪，冇理由支持佢。
　　
二、大長途二千四百米，港隊輸硬，買殿堂練馬師岳伯仁交當今第一高手莫雅騎的「石器時代」可也。
　　
三、二千米及千六米兩場捧布宜學騎日本隊的「地標圖形」及「野田赤蠍」。
　　
是日，日本隊「提款日」！

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。