獨家丨豬肉檔威威皮已收「深潛」23日 經理人助手齊失蹤訊息已讀不回

今年5月，36歲荃灣「豬肉佬」威威（劉宋威）突然爆紅，「威粉」於社交網成立「荃灣鮮肉威威應援團」，話咁快已超過萬三位成員，之後更於商場舉行生日會，吸引過百「威威豬（威威粉絲名稱）」帶同禮物及應援牌到場支持，當時威威仲感動到喊，抹淚相更被瘋傳，風頭一時無兩。

威威成世人最威水時光。

不過，隨著成噸負面新聞及舊照流出，令他好老竇及好老公形象完全崩壞，加上經常前言不對後語被網民設Page瘋狂狙擊。及至7月中他「終極一脫」，除下口罩拍益生菌廣告，真面目原來激似吳耀漢，AK（江?生）終於一天都光晒，由於鼻大加上輕度哨牙唔多靚仔，即出現「走粉」潮。

真係好似吳耀漢。

你都係戴返口罩啦。

威威久未現身豬肉檔
近日發現，威威嘅專頁及其應援群組自上月15日之後，已冇再更新，粉絲大爆連群組管理員都玩失蹤，搞到唔少「花生友」好掛住威威。有「威威豬」更在群組留言表示，連續兩星期冇見過威威現身豬肉檔，不過之後再更新話見到豬肉威瘦咗好多，而且當日對方已唔使斬豬肉，而係轉戰後台，幫處理射燈嘅工作人員扶住條摺梯。

威威好耐冇煮餸。

威威久未更新社交平台，最後一個PO已經係8月15日。

就威威動向，《星島頭條》記者由本周日開始分別致電及whatsapp聯絡威威經理人李小姐、豬肉檔大佬文哥及威威助手Maggie，3人不約而同跟威威一樣「深潛」，追問威威動向，例如點解冇更新應援Facebook群組？公司新安排及係咪已經放棄咗佢？一律已讀不回。

其實經理人李小姐早已潛入地殼底，早前就威威不斷被惡搞問過回應，對方冇回覆。

威威豬肉檔大佬同樣唔應機。

助手已讀不回。

專頁停運星途已完

今年5月中威威一夜成名，狂接廣告豬籠入水，《星島頭條》曾獨家報道威威收入倍增，除咗3萬蚊店長月薪外，每月額外有4萬蚊花紅，加埋廣告收入，月入近6位數。只可惜，人紅是非多，隨著威威不停被爆出黑歷史，又話佢係有背景人士、又傳有吸毒習慣，加上除罩後相當趕客，人氣不再，師奶Fans連保鮮紙附送嘅閃卡都唔要！威威嘅應援群組正式「罷工」，加埋煮食頻道專頁停運，「豬肉威」嘅星途唔夠100日就殞落。

威威以前真係好唔鍾意着衫。

威威曾開LIVE喊住否認自己係黑社會。

又去驗毒，事後證明六個月冇吸過毒。

為威威豬紋身，但被人踼爆圖案抄LuLu豬。

唔知相中粉絲睇返張相會唔會嬲自己?

TEXT:方騫平

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。