獨家丨張達倫望攞男配角獎風光回歸 離巢恨同偶像劉青雲合作

張達倫最近在《白色強人II》繼續飾演賤格無恥的醫院發展局主席「溫銘章」，他笑指今次賤得更立體，又自爆經常被唐詩詠和胡定欣取笑「不舉」。雖然在TVB工作18年一直同台前幕後打成一片，但達倫好想試新嘢，甚至跟偶像劉青雲對戲，更希望他日能挾住最佳男配角獎風光回歸。採訪：杜杜 攝影：朱偉彥 髮型：Seiko Sin@Hair Culture 服裝：Kenzo 場地：Pazzi Issokenmei

達倫在TVB拍的劇集只欠《法言人》未播，之後大家應該有段時間見不到他的電視作品。

達倫認為今次演的「溫銘章」更立體，賤得來多點人性，尤其面對有病的「YT」（郭晉安）。不過作為男人演不舉角色，仲要演兩次，他坦言唔尷尬，但一樣慘，「喺度不停畀人笑㗎！唐詩詠見到我每一次實講，定欣最初唔係好知，但係後尾知道都笑我啦！男仔反而冇乜邊個笑，可能佢哋自己?家係啩！哈哈！」

達倫認為「溫銘章」雖然賤格，但都有人性一面更好玩。

 

原來達倫跟定欣未入TVB做模特兒時已合作，所以被她取笑「不舉」也不覺尷尬。

太安穩想搵新衝擊

剛離開合作了18年的TVB，達倫坦承並非有任何不滿，反而是太安穩想搵些新衝擊，「試吓唔同嘅對手，唔同嘅班底，搵到第二個張達倫出嚟，所以我諗得好清楚，係時候出嚟試吓其他嘢。」講到最恨合作，當然是他頭號偶像劉青雲，「嘩！呢啲連個毛孔都係戲嘅人，好想合作吓，希望公司快啲安排，咁當然都要個故仔吸引到青雲哥嘅。」

劉青雲是達倫頭號偶像，未合作前有得合照都好開心。

達倫睇完《明日戰記》，都恨有機會拍科幻片。

達倫形容現在好似學成下山去闖盪江湖，所以難保他朝會再返娘家合作，當然他最希望能風光回歸，「我都希望有一日有角色啱，而我返番去TVB拍劇，畀人覺得同以前嘅張達倫又唔同咗，呢樣嘢係大家雙贏，我好想做到呢個張達倫，等如黃秋生同張衛健佢哋返番TVB拍嘢，我哋都覺得係唔同㗎喎！我都好想有日張達倫返去令人覺得張達倫真係唔同咗，所以希望五至十年之內，喺出面攞到一個最佳男配角獎，嘩！無得頂！獎項真係一個肯定嚟。」

 

---------------------------------------------

>>>立即瀏覽【移民百答】欄目：新移民抵埗攻略，老華僑也未必知道的事，移民、工作、居住、食玩買、交通、報稅、銀行、福利、生育、教育。

>>>即讀【新移民專欄】：新移民第一身經驗，與你分享當下年輕移民生活日常大小事，即讀「新移民專欄」。